Kuvendi Kombëtar i Partisë Demokratike i thirrur nga Sali Berisha ka miratuar sot një rezolutë e cila më së shumti është një distancim total nga çdo veprim që ka bërë ish-kryetari Basha gjatë drejtimit të PD.

Në rezolutë, teksa dënojnë drejtimin autokratik sipas tyre të partisë nga ana e Bashës, anëtarët e Kuvendit dënojnë dhe dhe distancohen nga praktika e bojkotit të zgjedhjeve, nga praktika e ‘djegies’ së mandateve parlamentare.

“Parlamentarizmi është vlerë thelbësore e çdo shoqërie të lirë dhe demokratike dhe Partia Demokratike është e vendosur të luftojë për forcimin e parlamentarizmit. Partia Demokratike do të jetë kudo ku luftohet për interesat e qytetarëve dhe një nga vendet kryesore të mbrojtjes së këtyre interesave është Kuvendi i Shqipërisë”, thuhet në Rezolutë.

Por një pikë e veçante i është kushtuar edhe skandalit me lobimin rus të Lulzim Bashës.

“Dënon dhe distancohet nga praktikat informale dhe jo transparente të mbledhjes dhe menaxhimit jashtëpartiak të fondeve për partinë. Ajo dënon dhe distancohet nga çdo përfshirje në skema financimi dhe qarkullimi parash përmes kompanive off-shore dhe kanaleve jo të ligjshme e jo transparente financiare. Ajo angazhohet në menaxhimin profesional dhe transparencën e plotë të të gjitha financave partiake”, thuhet në një prej pikave të Rezolutës.